Жителите на популарното француско летувалиште Ле Сабл-д’Олон се побунија против туристите кои шетаат полуголи низ улиците, па локалните власти воведоа забрана за движење без маица или во костим за капење надвор од плажата. Казната за прекршителите изнесува 38 евра.
„Малку пристојност, ве молам“, порача градоначалникот Јаник Моро, додавајќи дека станува збор за почит кон жителите и основна јавна хигиена, особено на пазарите и во продавниците.
Тој им порача на туристите: „Ако сакате да ги покажете вашите стомачни мускули или костими, имате 11 километри плажа – користете ги таму.“
Во рамки на кампањата, локалните власти објавија и постер со сатирична порака: „По 200 години елеганција, не сакаме долна облека на нашите улици!“ На него е прикажана еволуцијата на облеката на туристите – од елегантни француски парови до полуголи туристи без маици.
Новата регулатива е дел од поширока иницијатива за зачувување на угледот и културниот идентитет на летувалиштето.
