Палестинските вооружени групи предводени од Хамас денес изјавија дека нема да го прекинат отпорот сè додека не престане „окупацијата“ и не се воспостави независна и суверена палестинска држава со Ерусалим како главен град. Реакцијата доаѓа како одговор на т.н. „Њујоршка декларација“, која повика на разоружување на Хамас и прекин на војната во Газа.
Оваа декларација беше подготвена од Франција и Саудиска Арабија, како копретседавачи на меѓународната конференција, и ја поддржаа уште 15 земји, меѓу кои Бразил, Канада, Турција, Јордан, Катар, Египет и Велика Британија, како и Европската унија и Арапската лига.
Во документот се нагласува потребата од „праведно, мирно и трајно решение на израелско-палестинскиот конфликт“ врз основа на спроведување на решение со две држави. Исто така, се истакнува дека управувањето, спроведувањето на законот и безбедноста на целата палестинска територија мора да бидат исклучиво во надлежност на Палестинската самоуправа, со соодветна меѓународна поддршка.
Овие ставови се во согласност со обврските што ги презеде палестинскиот претседател Махмуд Абас во јуни, во обид да убеди поголем број земји да ја признаат палестинската држава. Иако Генералното собрание на ОН сè уште официјално не го осудило нападот на Хамас на 7 октомври 2023 година, кој ја предизвика израелската одмазда во Газа, текстот на декларацијата го осудува тој напад.
