Руското Министерство за одбрана објави дека нивните сили го зазеле стратешкиот град Часив Јар во Доњецк, нарекувајќи го „едно од најголемите упоришта на украинската војска“. Според Москва, градот е „ослободен“ како резултат на офанзива на Јужната борбена група во правецот Краматорск–Дружкивка.
Руски безбедносни извори тврдат дека во операцијата биле ликвидирани илјадници украински војници, што го претставуваат како најголемата украинска загуба од почетокот на војната. Но, ниту една независна потврда за овие тврдења не е достапна.
Од украинска страна, изјавите се сосема спротивни. Портпаролот на групата Хортиција, Виктор Трегубов, порача:
„Ситуацијата во Часив Јар е непроменета. Русија повторно лаже за да создаде медиумска врева, дури и преку деманти“.
Според украинската набљудувачка мрежа DeepState, борбите продолжуваат, при што украинските сили сè уште ги контролираат јужните и западните делови од градот, додека другите делови се под руска окупација.
Часив Јар, кој се наоѓа на највисоката точка во регионот, има големо стратешко значење за одбраната на Донбас. Доколку падне и логистичкото јазолно место Покровск, се отвора пат за пошироко руско напредување кон целосна окупација на Доњецк.
Во меѓувреме, руската летна офанзива продолжува и на други фронтови – кон Покровск во Донечката област и во обидите за пробив во Сумската и Дњепропетровската област.
