Балкан

Романија гради втор најголем рудник за бакар во ЕУ

Романија е на чекор до изградба на еден од најголемите рудници за бакар и злато во Европа – „Долина Ровина“. Проектот, управуван од канадската компанија „Еуро Сан Мајнинг“, е ставен на листата на 47 стратешки проекти на Европската Унија за критични минерални суровини и ќе има поддршка за забрзана реализација.

Рудникот ќе се гради во историскиот рударски регион во Романија, а содржи над 10 милиони унци златен еквивалент. Очекувањата се дека ќе стане најголемиот рударски проект во земјата по повеќе од четири децении. Недостасува уште само дозволата од еколошката студија, која треба да се изготви во следните месеци.

Во проектот како финансиер и стратешки партнер влегува мултинационалната компанија „Трафигура“, која обезбеди инвестиција од 200 милиони долари, со можност за уште толку до целосно отворање на рудникот. Компанијата „Трафигура“ е позната и на македонската јавност поради нејзиното учество во проектот за рудник за бакар во Иловица, преку поддршка на фирмата „Еуромакс ресоурсес“.

Во Македонија, пак, проектот Иловица-Штука останува заглавен во правна неизвесност, поради отпори од дел од јавноста и нерешени регулативи. Компанијата најави можност за меѓународна арбитража, повикувајќи се на билатералната спогодба за инвестиции со Швајцарија од 1996 година. Притоа, потсетуваат дека рудникот би донел 1.000 директни работни места при изградба, и 500 во текот на работењето, како и значаен фискален ефект за локалните општини.

Слични проекти на Кожуф и Казандол, кои исто така имаа странски инвеститори, останаа нереализирани, а македонската рударска индустрија бележи континуиран пад во учеството во БДП. Во земјава не е отворен нов рудник повеќе од 40 години, иако, според експертите, Македонија поседува залихи од критични минерали кои ЕУ ги идентификува како стратешки.

Во меѓувреме, новото Министерство за енергетика, рударство и минерални суровини најави измени во Законот за рударство, а МАНУ работи на нова Стратегија за минерални суровини со цел да се воспостават јасни, одржливи и законски регулирани услови за развој на секторот.

Извор: Plusinfo.mk

Балкан

Бугарските улици повторно преплавени со масовни демонстрации

Синоќа Софија и градовите ширум Бугарија беа преплавени од илјадници граѓани кои изразија гнев и незадоволство од власта, барајќи фер избори и независно судство способно да се бори против длабоко вкоренетата корупција.

Овие масовни демонстрации дојдоа по минатонеделните протести против контроверзниот буџетски план за 2026 година, кој предвидуваше повисоки даноци и зголемени владини трошоци. По бурните реакции, владата го повлече планот, но притисокот од улиците ја принуди да поднесе оставка, исполнувајќи го клучниот услов на граѓаните.

Сега Бугарија, членка на ЕУ од 2007 година, се наоѓа без буџет и редовна влада, на само неколку недели пред историското приклучување кон еврозоната на 1 јануари, кога ќе стане 21-та членка на еврозоната и ќе воведе еврото како официјално средство за плаќање.

Претседателот Румен Радев наскоро ќе назначи привремена влада и ќе закаже предвремени избори – веќе осми по ред од 2021 година.

Демонстрантите не бараат само оставки – тие инсистираат на избори кои нема да бидат компромитирани со манипулации, купување гласови и фалсификување резултати, како што се случи во претходните изборни циклуси.

Во центарот на гневот е влијателниот олигарх Делјан Пеевски, кој е под санкции од САД и Велика Британија. Неговата партија, Алијанса на права и слободи, ја поддржа коалицијата на партијата ГЕРБ предводена од поранешниот премиер Бојко Борисов, што само го засили чувството на незадоволство меѓу граѓаните.

Народот бараат слободни и фер избори, без манипулации, купување гласови и изборни фалсификати кои ја обележаа претходната кампања. Главната причина на нивната фрустрација е влијанието на олигархот Делјан Пеевски, санкциониран и од САД и од Велика Британија, чија што партија – Алијанса на права и слободи – го поддржа коалицискиот владин блок предводен од поранешниот премиер Бојко Борисов.

Балкан

Ново вооружување во Приштина – САД испорачуваат хаубици

Американскиот производител на воена опрема AM General и Министерството за одбрана на Република Косово, официјално постигнаа тригодишен рамковен договор за директна продажба , со кој Косовските безбедносни сили ќе се опремат со мобилни хаубици Hawkeye од 105 мм.

Според соопштението на компанијата, договорот опфаќа хаубици Hawkeye монтирани на шасија HUMVEE, како и дополнителни возила за логистичка и оперативна поддршка, со што значително се зајакнува мобилноста и огнената моќ на косовските сили.

„Со особена гордост ја објавуваме успешната продажба на системот HUMVEE Hawkeye на Министерството за одбрана на Косово. Оваа соработка ја потврдува нашата посветеност на развој и испорака на напредни решенија кои одговараат на современите воени предизвици“, изјави Џон Чедборн, извршен потпретседател за развој на бизнисот во AM General.

Системот Hawkeye комбинира топ од 105 мм со стандардната платформа HUMVEE, користејќи напредна технологија со низок отскок, што овозможува висока прецизност и стабилност при огнено дејство. Според компанијата, системот може да се распоредува, да отвори оган и повторно да се премести за помалку од 90 секунди.

Оваа способност за брзо „пукај и бегај“ дејствување значително ја зголемува преживливоста на единиците на бојното поле, особено во услови на контра-батериски оган, во споредба со класичните влечени артилериски системи, кои бараат значително повеќе време за распоредување и повлекување.

Со овој договор, Косово прави уште еден чекор кон модернизација на своите безбедносни капацитети, додека AM General ја зацврстува својата позиција како клучен снабдувач на мобилни артилериски решенија на глобалниот пазар.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.