Унгарската нискобуџетна авиокомпанија „Визер“ најави пет нови директни линии од Меѓународниот аеродром Скопје, како дел од програмата за субвенционирање на авиолинии од страна на Владата. Од ноември годинава, граѓаните ќе можат повторно да патуваат до Мадрид и Стокхолм, а од декември – и до Прага, Бари и Келн.
Со овие нови дестинации, „Визер“ значително ја проширува својата мрежа, особено со враќањето на линиите до Келн и Стокхолм, кои беа укинати минатата година. Новата рута до Стокхолм ќе слетува на главниот аеродром Арланда, што претставува значајно подобрување во однос на претходната рута.
Министерот за транспорт и врски Александар Николоски изјави дека ова е дел од поширока стратегија за зголемување на воздушната поврзаност на земјата:
„Со овие пет нови линии, бројот на новоотворени авиолинии од Скопје за една година достигнува 16. Тоа значи повеќе туристи, нови деловни можности и силен економски импакт,“ рече тој.
Програмата за субвенции, која нуди поддршка од 9 евра по патник кој слетува во Скопје, ја прави Македонија попривлечна за авиокомпаниите. Покрај „Визер“, нови линии воведуваат и други оператори како „Туркиш ерлајнс“, „Изиџет“ и „Луфтханза“, со што аеродромот станува важна регионална воздушна точка.
Новите летови не само што ќе овозможат поевтини и поудобни патувања за македонските граѓани, туку и ќе го зголемат приливот на странски туристи, дополнително поттикнувајќи го економскиот раст.
