Синоќа со голем аплауз и достоинство заврши јубилејното 55-то издание на најстариот фолклорен фестивал во Македонија – „Илинденски денови“, оваа година под мотото „Денес за утре“.
Фестивалот повторно ја оживеа богатата традиција низ песни, ора, носии и уметност, давајќи контекст на континуитетот и почитта кон културното наследство.
Жири-комисијата составена од врвни експерти во областа на традиционалната култура, меѓу кои проф. д-р Владимир Јаневски, проф. д-р Родна Величковска, проф. д-р Мирјана Мирчевска, проф. д-р Беким Рамадани и доц. м-р Христијан Николовски, ги одбра најдобрите учесници и додели признанија.
Добитници на наградите се:
• КУД „Илинден“ од Демир Хисар – најуспешна група за традиционална музика и игра
• ВИА „Распеани струмичани“ од Струмица – најуспешна група за староградска музика и игра
• Јовче Нанев од КУД „Весели пензионери“ Пробиштип – најуспешна вокална изведба
• КУД „Илинден“ од Струга – најкомплетна изворна носија
• Специјално признание за афирмација на традицијата добија илустраторот на стрип Димитри Балојани и КУД „Русалии“ од Секирник.
Фестивалот „Илинденски денови“ и годинава ја потврди својата улога како чувар и промотор на македонската културна традиција, носејќи порака за зачувување на корените и инспирација за идните генерации.
Нека одекнуваат традиционалните звуци и ора и во годините што следат – за утре, но со почит кон она што сме го наследиле.
