Индија јасно стави до знаење дека не е заинтересирана за купување на американските стелт ловци F-35, и покрај силниот притисок од Вашингтон, објави Bloomberg, повикувајќи се на анонимни извори запознаени со преговорите. Темата се појавила при посетата на премиерот Нарендра Моди на Белата куќа во февруари годинава, кога претседателот Доналд Трамп лично ја понудил напредната леталица како дел од пошироко стратешко партнерство.
Но, индиските власти остануваат цврсти во определбата за одбранбени договори кои вклучуваат трансфер на технологија, локално производство и зајакнување на домашните индустриски капацитети. „Повеќе сме заинтересирани за партнерства што вклучуваат заеднички развој и производство во Индија“, изјавил еден владин функционер.
Во меѓувреме, Москва брзо реагираше со понуда за двоен пакет: ловец од петтата генерација Су-57Е и мултифункционалниот Су-35М. Рускиот државен гигант Ростек и производителот Сухој наводно понудиле целосен трансфер на технологија за Су-57Е, со монтажа во погонот на Hindustan Aeronautics Limited во Нашик, каде веќе се произведени над 220 авиони Су-30МКИ.
Понудата предвидува до 60% учество на индиската индустрија во производството, со можност за интеграција на домашни системи како ракетата „Астра“, противрадарските ракети „Рудрам“ и AESA радарот „Вирупакша“. Почетната испорака на 20 до 30 авиони се очекува во рок од три до четири години, а целокупната нарачка би можела да достигне 100 единици до 2030-тите, доколку Русија може да одржи континуирано производство во воени услови.
Дополнително, Су-35М се нуди како побрза алтернатива за зајакнување на индиското воздухопловство, бидејќи дели 80% компоненти со постоечкиот Су-30МКИ, што би ги поедноставило логистиката, одржувањето и обуката на пилотите.
Индија со оваа одлука испраќа јасен сигнал дека не е само купувач, туку стратешки играч кој сака да ја зајакне својата индустриска и технолошка независност.
