Иако неодамна јавно ги критикуваше политиките на Доналд Трамп, извршниот директор на SpaceX, Елон Маск, повторно финансиски застана зад републиканската партија. Според извештај на „Политико“, Маск во јуни донирал вкупно 25 милиони долари – 15 милиони за Републиканската партија и дополнителни 10 милиони за напорите да ја задржат контролата врз Конгресот.
Оваа постапка доаѓа само еден месец откако Маск изјави дека веќе „доволно потрошил на политика“ и дека нема намера да продолжи со донации. Минатата година, тој вложи 290 милиони долари во политички активности, најмногу во корист на Трамп и републиканските кандидати кои се залагаат за намалување на бирократијата и државните трошоци.
Иако Маск јавно се дистанцира од поединечни политички лидери, неговите финансиски потези укажуваат на континуирана поддршка за конзервативните позиции. Сè повеќе аналитичари укажуваат на влијанието што Маск го има врз политичката сцена, особено преку донации, јавни изјави и контролата над медиумски платформи како X (поранешен Twitter).
