30 јули 2025, Скопје – Во најновиот извештај, Агенцијата за кредитен рејтинг „Стандард и пурс“ го потврди кредитниот рејтинг на земјата ББ- со стабилен изглед, што воедно е и потврда за политиките на Владата, а претставува и значаен сигнал за инвеститорите при носењето на нивните одлуки за инвестирање.
Во извештајот, Агенцијата посочува дека растот на економијата забрзува и останува приоритет на Владата.
Во извештајот е наведено дека растот на економијата оваа година се очекува да биде поддржан главно од потрошувачката на домаќинствата, движен од растот на платите и пензиите, како и од зголемена инвестициска активност, особено во инфраструктурата. Притоа, Агенцијата упатува на ризици кои произлегуваат од неизвесноста во европската економија како главен трговски партнер на земјата. До 2028 година, Агенцијата проектира дека растот ќе се стабилизира на околу 3%, поддржан од постепено закрепнување на надворешната побарувачка и засилување на инвестициите.
Владата, како што стои во извештајот, продолжува со напорите за спроведување институционални реформи, борба против корупцијата и владеење на правото, коишто се и клучни предуслови за интеграција во ЕУ. „Стандард и пурс“ истакнува дека економскиот раст останува главен приоритет на Владата со цел остварување раст до 5% на среден рок, поттикнат од реализација на амбициозни инфраструктурни проекти, како што се коридорите 8 и 10д и зголемени инвестиции во приватниот сектор, потоа поефикасна наплата на даноци, како и понатамошно зголемување на пензиите и платите во јавниот сектор за поддршка на домашната побарувачка. Посочува дека јавната потрошувачка останува експанзивна и упатува на спроведување фискална консолидација, при што потенцира дека со усвоениот ребаланс е потврдена целта за буџетски дефицит од 4% од БДП во 2025 година. Според Агенцијата, со Фискалната стратегија е утврдена постепена фискална консолидација, но таа очекува одредени ризици за остварување на проекциите. Од почетокот на годината до мај, приходите бележат раст од 9% на годишно ниво, водени од поголемата наплата на данокот на личен доход, зголемените приходи од акцизи, како и од растот на неданочните приходи. Во истиот период, на страната на расходите потрошувачката бележи раст за 5%, како резултат на растот на платите во јавниот сектор, тековните расходи и социјалните трансфери. Во однос на долгот, посочуваат дека и покрај затегнатите глобални финансиски услови, сервисирањето на долгот останува релативно контролирано.
Според „Стандард и пурс“, Владата и понатаму останува посветена на евроинтеграцијата, процес кој Агенцијата го истакнува како важен столб за напредок во структурните реформи на среден рок.
Кредитниот рејтинг на земјата „Стандард и пурс“ го оценува два пати во годината.
