Сѐ повеќе туристи кои летуваат на Хвар се жалат на енормно високите цени што ги дочекуваат на ова хрватско островско рајско место. Според посетителите, цените во текот на туристичката сезона се драстично зголемени, оставајќи многумина изненадени уште при првото појадување.
Изнајмување лежалки на популарните плажи чини од 25 до 40 евра, додека луксузните балдахини достигнуваат и до 200 евра. Повратен билет за такси брод меѓу плажите чини околу 10 евра, што дополнително го оптоварува буџетот на просечниот турист.
Цените на пијалаците исто така не заостануваат – еден коктел на плажа чини околу 12 евра, додека во баровите надвор од плажата се движи од 10 до 20 евра. Еден сендвич чини 15 евра, порција помфрит 10 евра, а целосен оброк со месо може да достигне до 20 евра.
Најголемото изненадување за многумина доаѓа наутро: појадок за три лица со две кафиња во ресторан може да надмине дури и 100 евра. Самото кафе чини меѓу 4 и 7 евра, зависно од локацијата.
Ниту цените во маркетите не се поштедени – килограм праски на Хвар чини околу 6,5 евра.
Туристичките експерти предупредуваат дека ваквите цени би можеле да имаат долгорочни последици врз интересот за одмор во Хрватска, особено кога сè повеќе патници бараат попристапни и транспарентни дестинации.
