Македонија

Мицкоски: Илинден е обврска, оваа генерација политичари ќе покаже дека може подобро

Премиерот Христијан Мицкоски во својата честитка по повод 2 Август – Илинден порача дека празникот не е само симбол на минатото, туку и жива обврска за иднината. Тој истакна дека стремежот за слобода и правда, започнат од Илинденците и потврден во АСНОМ, денес е задача на институциите и граѓаните – да се надминат поделбите и да се гради силна, праведна и безбедна Македонија.

„Илинден е вистината за Македонија која живее. Тоа не е само историја – тоа е жив идентитет, потсетник на стремежот за слобода, правда и сопствена држава. Стремежот денес е остварен, но не и завршен“, порача Мицкоски.

Тој додаде дека Илинден е и одговорност, особено за политичките институции, кои имаат обврска да го продолжат патот започнат во Крушево и потврден во Првото заседание на АСНОМ, со работа, чесност и визија.

„Оваа генерација политичари има должност да покаже дека може подобро. И ќе покаже! Свесни сме дека довербата на граѓаните се оправдува со резултати. Затоа сме посветени да ја направиме Македонија држава на можности – праведна, безбедна и просперитетна, со силни институции на страната на народот“, нагласи премиерот.

Мицкоски ја искористи приликата да повика на национално единство околу идејата за современа Македонија, која ќе ги надмине поделбите и ќе ја претвори историската сила во одржлива иднина.

„Нека е вечен Илинден! Нека е жива и вечна Македонија!“, заврши премиерот.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.