Тетово, 2 август 2025 – Министерството за внатрешни работи започна со реализација на нова превентивна мерка за зголемување на сообраќајната безбедност, со поставување мобилни радари на клучни делници од автопатиштата, меѓу кои и на влезот во Тетово.
Станува збор за флеш-радари кои се поставуваат на различни локации, вклучително и на средината од автопатот, што предизвика различни реакции кај јавноста. Дел од граѓаните ја поздравуваат иницијативата како неопходна за спречување сообраќајни несреќи, додека други ја сметаат за провокација и скриена замка за казнување.
„Целта не е казнување по секоја цена, туку предупредување и дисциплинирање на возачите“, истакнуваат од МВР.
Засега не е прецизирано колку радари ќе бидат инсталирани низ земјата, но од полицијата најавуваат дека оваа мерка ќе се прошири и на други фреквентни делници.
