Спорт

Нов скандал со Шкупи: Сомнителен натпревар со 7+ голови против Анталијаспор

Македонскиот прволигаш Шкупи повторно се најде во центарот на вниманието – не поради спортски успеси, туку поради сериозни сомнежи за местење натпревари и врски со нелегално обложување. Контролниот натпревар одигран вчера против турскиот прволигаш Анталијаспор, кој заврши со убедлив пораз од 6-1, ја разгори јавноста со нови прашања за кредибилитетот и интегритетот на клубот од Чаир.

Резултатот сам по себе е алармантен, но сомнежите добија на тежина по информациите дека на записникот за натпреварот биле пријавени само 14 фудбалери, а екипата патувала од Скопје во три одделни групи. Сето тоа наводно било проследено со масовни уплати на обложувалници во Блискиот Исток, модел кој, според познавачите на состојбите, станува препознатлив за клубот.

Неколку дена пред натпреварот, клубот Аресими одби да одигра пријателска средба со Шкупи, откако добиле информации за можен наместен резултат со повеќе од пет голови. Тој потег тогаш помина речиси незабележано, но последните случувања ги отворија повторно сомнежите – и прашањето: кој ќе ја преземе одговорноста?

Според информации од фудбалски извори, Фудбалската федерација на Македонија веќе започнала постапки против клубот. Сепак, јавноста бара поактивна улога и од државните институции – Обвинителството, МВР, Финансиската полиција – за да се испрати јасна порака дека македонскиот спорт не е поле за криминал и манипулации.

Дополнителна сенка врз случајот фрла и блискоста на актуелниот спортски директор на Шкупи, Флорим Муча, со поранешниот претседател на ФФМ, Муамед Сејдини, што отвора прашања за евентуални релации и влијанија во позадина.

Ако се потврдат обвинувањата, тоа би значело не само крај на спортскиот кредибилитет на Шкупи, туку и сериозно нарушување на довербата во целокупниот фудбалски систем. Потребна е итна и бескомпромисна реакција од сите надлежни институции – молкот повеќе не е опција.

Извор: Макфудбал

Спорт

Македонија стана полноправна членка на Медитеранската ракометна конфедерација

Македонската ракометна федерација (РФМ) денеска објави дека нашата земја е примена како полноправна членка на Медитеранската ракометна конфедерација. Досега Македонија имаше статус на придружна членка.

Одлуката беше донесена на седмиот конгрес на Медитеранската конфедерација, кој се одржа во рамките на изборниот конгрес на Меѓународната ракометна федерација во Каиро, Египет.

Следната година македонските ракометарки и ракометари ќе имаат активна улога на меѓународната сцена. Пионерките ќе учествуваат на Медитеранскиот шампионат во февруари во Приштина, додека кадетите ќе настапат во април во Словачка. Сениорите ќе се борат за медалите на Медитеранските игри во август во италијанскиот град Таранто.

Спорт

Омерагиќ: Посетата на Мамадов отвора нова фаза за македонскиот фудбал

Во „Куќа на фудбалот“ се одржа средба меѓу раководството на Фудбалската федерација на Македонија и Елкан Мамадов, директор за асоцијации и развој во ФИФА и еден од најблиските соработници на претседателот Џани Инфантино.

Претседателот на ФФМ, Масар Омерагиќ, истакна дека посетата на Мамадов претставува силна потврда за одличната соработка со ФИФА и континуираната поддршка што федерацијата ја добива во реализацијата на стратешките цели, со посебен акцент на инфраструктурата и зајакнувањето на националните селекции.

Омерагиќ најави дека веќе се договара и посета на претседателот на ФИФА, Џани Инфантино, во првата половина на 2026 година, што дополнително ќе ја зацврсти соработката и ќе отвори нови можности за развој на македонскиот фудбал.

Тој нагласи дека ФФМ останува целосно посветена на принципите што се од клучно значење за ФИФА – транспарентност, одговорност и долгорочен развој на фудбалот на сите нивоа во Македонија.

Спорт

ФФМ и Масар Омерагиќ со честитка до Шкендија за европскиот успех

Фудбалската федерација на Македонија и нејзиниот претседател Масар Омерaгиќ упатија честитки до фудбалскиот клуб Шкендија за изборениот пласман во елиминациската фаза од УЕФА Лигата на конференции.

Од ФФМ оценуваат дека остварениот успех е резултат на професионален пристап, изразен тимски дух и јасна амбиција за докажување на меѓународната сцена. Воедно, пласманот на Шкендија се посочува како значаен придонес за промоција на македонскиот клупски фудбал во европските натпреварувања.

„Успехот на Шкендија е потврда за квалитетната работа на клубот и неговото претставување надвор од границите на државата“, се наведува во честитката од Фудбалската федерација.
ФФМ им посака на фудбалерите и на стручниот штаб на Шкендија успешни и квалитетни настапи во продолжението од европската кампања, со надеж дека клубот ќе продолжи достојно да ја претставува Македонија на меѓународната фудбалска сцена.