Украинскиот претседател Володимир Зеленски денеска соопшти дека Националното биро за борба против корупција (НАБУ) и Специјализираното обвинителство за борба против корупција (САПО) откриле случаи на примање мито од страна на еден народен пратеник, неколку раководители на окружни и градски управи, како и членови на Националната гарда на Украина.
„Разоткривме еден народен пратеник, раководители од окружните и градските управи, и членови на Националната гарда кои примале мито. Им се заблагодарувам на антикорупциските органи за нивната несебична работа. Само нулта толеранција кон корупцијата може да гарантира успех“, изјави Зеленски преку својата платформа на Телеграм, пренесува Укринформ.
Тој нагласи дека е од исклучителна важност антикорупциските институции да функционираат независно и потенцираше дека новиот закон, усвоен неодамна, им дава вистински шанси на овие органи за ефикасна борба против корупцијата.
Украинскиот парламент на 22 јули донесе закон со кој се намалија правомоштијата на НАБУ и САПО, што предизвика протести во Киев и други градови. По реакциите, на 24 јули Зеленски го одобри новиот закон со кој им се враќаат полномоштва на антикорупциските тела, а тој беше усвоен од парламентот на 31 јули и веднаш потпишан од претседателот.
