По години политички тензии и блокади, германската влада конечно дала зелено светло за продажба на 40 борбени авиони „Eurofighter Typhoon“ на Турција, што претставува значаен пресврт во односите меѓу Анкара и Берлин. Договорот, потпишан за време на Саемот за одбрана IDEF 2025 во Истанбул, подразбира склопување на авионите во Велика Британија со компоненти испорачани од Германија.
Овој потег доаѓа по серија дипломатски и безбедносни разговори во рамките на НАТО, каде Турција долго време беше заинтересирана за модернизација на својата флота, особено откако САД ја исклучија од програмата за F-35 поради купувањето на рускиот систем S-400.
Одлуката на германското Сојузно безбедносно советодавно тело уследи по смената на власта – новата коалиција на ЦДУ/ЦСУ и СПД зазеде пофлексибилен пристап кон Анкара, надминувајќи ги претходните блокади врз основа на демократијата и човековите права.
Според договорот, Турција ќе добие 20 користени и 20 нови Eurofighter-и од моделот Typhoon II, со напредна електроника и радарски системи. Вредноста на договорот се проценува на околу 4,5 милијарди евра, а првите испораки се очекуваат кон крајот на 2026 година.
Грција, иако традиционално ривалска на Турција во Егејот, ја прими оваа информација без изненадување. Атина била претходно информирана и проценува дека набавката нема драматично да ја промени рамнотежата на силите во регионот.
Со оваа набавка, Турција прави крупен чекор кон зајакнување на својата стратегиска автономија и одржување на воздушна супериорност, додека Eurofighter се позиционира како силна алтернатива на американскиот F-35, чија цена и комплексност ги оддалечија некои потенцијални купувачи.
