Тимот на Меѓународната агенција за атомска енергија (МААЕ) денеска забележал чад и слушнал експлозии во близина на нуклеарната електрана Запорожје – најголемата во Европа – која од март 2022 е под руска окупација. Според информации на вработените во централата, мета биле помошни објекти лоцирани на околу 1.200 метри од главниот комплекс, пренесе Kyiv Independent.
Нападот започнал околу 9 часот со дронови и артилериско гранатирање, а звуците на воена активност биле слушнати и од позициите каде се наоѓаат експертите на МААЕ. Директорот на агенцијата Рафаел Маријано Гроси предупреди:
„Секој напад во близина на нуклеарна централа, без разлика која е метата, претставува ризик за нуклеарната безбедност и мора да се избегне. Повторно апелирам за максимална воена воздржаност околу ваквите објекти.“
Русија гради нова електрична мрежа за приклучување на Запорожје
Истовремено, според New York Times и Greenpeace, Русија гради нови далекуводи на окупираните јужни територии од Украина, со цел да го приклучи Запорожје кон сопствената електроенергетска мрежа. Сателитски снимки покажуваат дека од февруари се поставени над 80 километри далекуводи долж брегот на Азовското Море, меѓу Мариупол и Бердјанск.
Целта, според Greenpeace, е приклучување кон главната трафостаница кај Мариупол, од каде би можело да се обезбеди енергија и за самата нуклеарка, оддалечена околу 225 километри.
Украински дрон предизвика пожар во нафтено складиште во Сочи
Повеќе од 120 пожарникари се бореле со голем пожар во нафтено складиште во рускиот град Сочи, по украински напад со дронови, соопшти гувернерот на Краснодарскиот крај, Венјамин Кондратјев.
Пожарот зафатил резервоар со капацитет од 2.000 кубни метри. Рускиот авио-регулатор Росавијација извести дека летовите на аеродромот во Сочи се привремено суспендирани поради безбедносни причини.
Нападот се случил во областа Адлер – дел од Сочи – каде во 2024 година била и демолирана претседателската летна резиденција „Бочаров Ручеј“, поради страв од украински ракетни и дрон напади. Од тогаш, Владимир Путин не се појавил во Сочи.
Нови напади во руските региони, Кијава под ракетен оган
Освен во Сочи, украински дронови нападнале и објекти во Вороњешката област, каде, според гувернерот, била повредена една жена, а настанале неколку пожари. Во истовреме, руската армија извршила нов масовен ракетен напад врз Киев.
Сочи, домаќин на Зимските олимписки игри во 2014 година, ретко беше цел на напади во првите две години од војната, но последните случувања укажуваат на промена на украинската стратегија, насочена кон длабоко во руската територија и симболично важни локации.
