Спорт

Ристовски: МОК побара помош дури неколку месеци пред фестивалот, иако политиката формално нема улога во олимписки настани

Остри јавни критики и жестоки дебати за одговорностите и капацитетите на институциите за спорт во државава се отворија по одржувањето на Европскиот младински олимписки фестивал (EYOF) летово во Скопје. Министерот за спорт Борко Ристовски во интервју за онлајнпорталот „Радио Слободна Европа“ одговори на јавниот интерес каде се направени пропустите во организацијата, објаснувајќи дека Министерството за спорт немало ниту законска надлежност ниту формална улога во организирањето на фестивалот, туку постапувало исклучиво на барање од организаторите – Олимпискиот комитет на Македонија (МОК) и Градот Скопје – само неколку месеци пред настанот.

„Кога се потпишува договор за доведување или за организирање на ваков голем настан во една држава, заради немешањето на политиката, потписници на договорот за организирање на EYOF се МОК и Градот Скопје. Тоа е стандардна олимписка пракса за да се избегне политичко мешање. Тоа кажува дека Олимпискиот светски комитет и Европски не дозволува мешање на политика во Олимписките игри и во Олимпизмот генерално. Така да, ние не можеме да бидеме организатори, меѓутоа можеме да служиме како логистичка поддршка, што и бевме во конкретниот случај“ изјави Ристовски.

Во март или април, според министерот, тој лично разговарал со претседателот на Европскиот олимписки комитет за да го алармира дека државата нема доволна спортска инфраструктура за организација на настан од ваков обем.

„Предложивме Олимпијадата да се откаже или да се намали бројот на учесници на 1.000 – што беше максимумот за кој можеме да гарантираме со постојните капацитети. Но бевме одбиени бидејќи било предоцна,“ објаснува тој.

Според Ристовски, во последните два месеца пред фестивалот, Министерството било вклучено со конкретни активности:

„Нè замолија да купиме 150 нови кревети за студентските домови – што остануваат за нивна трајна употреба. Обезбедивме и донација од 2.000 перници од општествено одговорна компанија, делумно финансиравме автобуски превоз, обезбедивме бесплатен пристап до сите спортски сали и помогнавме во маркетингот – преку реклами на автобуси. Работевме и со МНР на забрзување на процесот за визи за странските делегации,“ вели министерот.

За организацијата на настанот министерот објаснува дека „иако организацијата во одреден момент затаи, меѓутоа не беше на ниво катастрофално како што тоа сака да го прикажат поединци или опозицијата“. Имало пропусти но смета дека тие биле очекувани за настан од таков обем и дообјаснува

„Да угостите над 4.000 деца е огромен предизвик за секоја држава. Нормално е да има некои недостатоци. Не постои држава на светот или Олимписки комитет на светот или град на светот што може да го организира без недостатоци и тоа е во ред“, вели министерот.

Според него проблемите кои се појавиле од техничка природа се работа што бараат две години претходно подготовка, а не два месеца пред фестивалот.

„Кога ќе потпишувате еден ваков договор за сериозна организација, мора државата, заедно со градот којшто е домаќин или Олимпискиот комитет да работи на организација барем минимум две до три години, за да се создадат услови за беспрекорно работење или функционирање, одвивање на оваа Олимпијада. Зборувам сега за делот за во одредени сали кај што немаше ладење, да се стават клими уреди да се направи ладење. Ако има некој недостаток, не знам, технички на паркетот, на соблекувалните, се тоа да се изведе со време. Меѓутоа пак ќе повторам, за ваква сериозна организација треба минимум две години припрема за да ја претставите државата во едно светло, а второ и тие дечиња се чувствуваат комотно и да можат да го дадат својот најдобар спортски перформанс“, објаснува Министерот.

На прашањето од „Радио Слободна Европа“ дека за заедничкото појавување на Ристовски и претседателот на МОК, Даниел Димевски, на отворањето на настанот, имајќи предвид дека министерот претходно го обвини Димевски за криминал и најави кривични пријави, минисетрот одговори:

„Моето мислење за него ќе го задржам за себе. Но имам обврска како министер и како претставник на државата-домаќин да бидам на тие настани. Поважен односот меѓу нас е како ќе се претстави државата и како ќе функционира организацијата,“ вели Ристовски, додавајќи:

„Што само по себе ќе каже дека мораме сите без разлика на нашите несогласувања што јас мислам за него или што тој мисли за мене, да си ги исполнуваме обврските во интерес на доброто на спортот и на тоа како треба да изгледа една Олимпијада.“

Министерот остро ги отфрли и обвинувањата од страна на СДСМ дека маркетингот на фестивалот го водела агенција блиска до него.

„Социјалдемократскиот сојуз не знаат како функционира системот. Соработувавме со МОК само технички и само кога тоа беше побарано. Нивната критика е политичка тема на којашто се налепија. Јас ги разбирам, ја разбирам нивната безидејност, навистина. Меѓутоа мислам дека на Македонија и треба едно политичко-социјална хигиена во делот на политиката.“ изјави Ристовски.

Спорт

Омерагиќ: Посетата на Мамадов отвора нова фаза за македонскиот фудбал

Во „Куќа на фудбалот“ се одржа средба меѓу раководството на Фудбалската федерација на Македонија и Елкан Мамадов, директор за асоцијации и развој во ФИФА и еден од најблиските соработници на претседателот Џани Инфантино.

Претседателот на ФФМ, Масар Омерагиќ, истакна дека посетата на Мамадов претставува силна потврда за одличната соработка со ФИФА и континуираната поддршка што федерацијата ја добива во реализацијата на стратешките цели, со посебен акцент на инфраструктурата и зајакнувањето на националните селекции.

Омерагиќ најави дека веќе се договара и посета на претседателот на ФИФА, Џани Инфантино, во првата половина на 2026 година, што дополнително ќе ја зацврсти соработката и ќе отвори нови можности за развој на македонскиот фудбал.

Тој нагласи дека ФФМ останува целосно посветена на принципите што се од клучно значење за ФИФА – транспарентност, одговорност и долгорочен развој на фудбалот на сите нивоа во Македонија.

Спорт

ФФМ и Масар Омерагиќ со честитка до Шкендија за европскиот успех

Фудбалската федерација на Македонија и нејзиниот претседател Масар Омерaгиќ упатија честитки до фудбалскиот клуб Шкендија за изборениот пласман во елиминациската фаза од УЕФА Лигата на конференции.

Од ФФМ оценуваат дека остварениот успех е резултат на професионален пристап, изразен тимски дух и јасна амбиција за докажување на меѓународната сцена. Воедно, пласманот на Шкендија се посочува како значаен придонес за промоција на македонскиот клупски фудбал во европските натпреварувања.

„Успехот на Шкендија е потврда за квалитетната работа на клубот и неговото претставување надвор од границите на државата“, се наведува во честитката од Фудбалската федерација.
ФФМ им посака на фудбалерите и на стручниот штаб на Шкендија успешни и квалитетни настапи во продолжението од европската кампања, со надеж дека клубот ќе продолжи достојно да ја претставува Македонија на меѓународната фудбалска сцена.

Спорт

Ристовски за МИА: Не можеме да креираме спортски резулти, но може да создадеме подобри услови за спортистите што создаваат успеси

Министерството за спорт не може да креира успеси во спортот. Успесите ги креираат федерациите, клубовите, тренерите. Ние сме тука да направиме услови што е можно подобри за тие луѓе да можат да работат и да создаваат успеси – истакна министерот за спорт Борко Ристовски во интервјуто за МИА, во кое ги сумира резултатите и ги посочи приоритетите во работата на Министерството за спорт во наредната година.

-Имаме повеќе приоритети. Еден од нив е донесувањето на новиот закон за спорт, подобрување на спортската инфраструктура, обезбедување на средствата или субвенциите од државата на вистински начин и со тоа да стимулираме што е можно повеќе спортски резултати. Но, повторно, ние не можеме да креираме успеси – не сме креатори на спортските резултати – меѓутоа можеме да ги поддржиме вистинските спортисти, вистинските клубови, да направиме нов закон за спорт, да изградиме спортска инфраструктура која ќе остане како трајна вредност во општеството. Тоа се главните приоритети на ова Министерство, заедно со подигнување на стандардите на неговото функционирање – вели министерот Ристовски.

За само година и половина, Министерството за спорт направи сериозни реформи – од затекната институција на ниско ниво до поставување темели за европски стандарди.

-За активен период од една година, година и пол на Министерството за спорт, направивме огромни поместувања во сите сегменти на неговото функционирање. Сите сме свесни дека ова беше институција која навистина беше на многу ниско ниво. Институција во која и вработени и раководни лица сè уште се под обвинение. Така што, после година и пол можам да кажам дека направивме огромни поместувања во тоа како треба да функционира една институција. Дали недостига уште многу за да стигнеме до европски стандарди? Да, меѓутоа ова е само почеток и мислам дека од година во година ќе одиме сè повисоко на скалилото на она што значи услуга и давање можност и на спортот и на сите овие луѓе кои што сакаат да се рекреираат и професионално да се занимаваат со спорт – посочи Ристовски.

Резултати во изминатите години, освен поединечни блесоци, немаме, што е поразително за една спортска нација како Македонија. Тоа се должи на системот кој со години функционирал и кој ние сега сакаме да го реформираме, истакна министерот за спорт.

-Реформа која значи вистинска поддршка и вложување во млади, талентирани спортисти, реформа која значи вложување во вистински спортските клубов или спортските субјекти, како сакате, и вложување во спортската инфраструктура која, најнапред, треба да ги обезбеди потребните услови за да може еден спорт да се развива и да бараме врвни резултати. Без инфраструктура не може да барате и да очекувате врвни резултати, и токму тоа е процесот или реформите кои ги започна Министерството за спорт. Мислам дека тоа не е процес кој може да даде резултати преку ноќ, меѓутоа, драго ми е што се забележува и во јавноста дека спортската инфраструктура ги прави првите чекори на промените во спортот или реформите во спортот. Сигурен сум дека за неколку години од сега ќе видиме многу повеќе успеси и во индивидуалните и во колективните спортови, пред сè, затоа што ќе создадеме повеќе услови за да се зголеми квантитетот и да можеме да имаме поголем избор, а спортските екипи и субјекти да имаат поголем избор при селекција на талентирани деца и на кадрите генерално, за да можеме да одиме едно скалило погоре и да постигнуваме уште поголеми резултати на спортски план – вели Ристовски.