Балкан

Силно невреме во Далмација: Поплави во Сплит, драматични сцени во Комижа

Делови од Далмација вчера беа зафатени од силно грмежливо невреме кое предизвика поплави, прекин на струја и драматични сцени на море и копно. Според хрватските медиуми, бурата прво удрила во делови од Далматинска Загора и Цетинската краина, по што облаците се насочиле кон средниот Јадран.

Околу 19 часот невремето го зафатило островот Бишево и градот Комижа на Вис, каде што ветрот дувал со силина од 50 јазли. Температурата во Комижа паднала од 30 на само 21 степен за кратко време, а во зависност од локацијата, наврнале од 5 до 30 литри дожд на метар квадратен.

Силен ветер отфрлил едра јахта кон југозападните брегови на Вис, јавуваат очевидци за порталот Dalmacija Danas.

Невремето потоа се проширило кон Хвар и Брач, со дожд кој опфатил широк појас од Трогир и Чиово па сѐ до Корчула. Во селото Дол на Хвар, за помалку од еден час наврнале повеќе од 20 литри дожд на метар квадратен.

Во Сплит, врнежите почнале околу 20:30 часот и предизвикале вистински „потоп“ низ улиците. Натпреварот меѓу Хајдук и Истра започна со речиси еден час задоцнување поради прекин на струја на стадионот „Полјуд“. Електричната енергија се врати нешто по 21 часот, со што условите за игра беа нормализирани.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.