Црна Хроника

Уапсени изнудувачи: Падна рекетарска мрежа поврзана со познати криминални кланови

Бирото за јавна безбедност реализираше голема акција против организирана изнуда, уапсувaјќи лице на дело при примопредавање на 165.000 евра – пари прибрани со закани, уцени и рекет што траел со години.

Операцијата е спроведена по налог на обвинителството и по претходна криминалистичка обработка, со целосна правна процедура и судски налог. Според неофицијални извори, зад мрежата стојат лица од скопската населба Арачиново, припадници на фамилијата Маслани, која се доведува во врска со криминалните банди Барон и Беланоца.

Полицијата потврди дека делото е документирано со јасни докази, а засиленото полициско присуство во Куманово и Арачиново е дел од поширока стратегија за сузбивање на организираниот криминал.

„Ова не е изолиран случај. Ова е порака. Нема повеќе недопирливи. Нема повеќе рекет над чесни граѓани. Законот важи за сите“, изјави висок извор од истрагата за Плусинфо.

Институциите најавуваат дека ќе продолжат со ударите врз мрежи кои преку страв и насилство го уценувале населението и ја поткопувале правната држава.

Извор; plusinfo.mk

Црна Хроника

Напад со нож – едно лице тешко повредено

Во струшкото село Драслајца, на 19 декември 2025 година, едно лице било нападнато со нож, при што претрпело тешки телесни повреди. Повредениот, И.С. (33) од селото Ложани, бил веднаш пренесен во Општата болница во Струга за укажување на лекарска помош.

На местото на инцидентот извршен е увид од јавен обвинител и полициски екипи, а се преземаат мерки за расчистување на настанот и идентификација на сторителот.

Црна Хроника

Маглата предизвика верижна сообраќајка во Скопје, сообраќајот се одвива отежнато

Попладнево на влезот во Скопје, веднаш по наплатната рампа кај Петровец, се случи верижна сообраќајна несреќа во која учествувале повеќе патнички возила.

Според сведоштва на граѓани објавени на социјалните мрежи, густата магла значително ја намалила видливоста, што довело до отежнато и забавено одвивање на сообраќајот во овој дел од патот. Возачите кои минуваат низ оваа делница апелираат на зголемена претпазливост и прилагодување на брзината на актуелните услови.

Полициски екипи се присутни на терен и вршат увид на местото на несреќата. Повеќе информации за причините и евентуалните последици од сообраќајката се очекуваат по завршување на истрагата.

Црна Хроника

Работник загина при несреќа на градилиште – врз него паднала машина за бетон

Работник од Република Албанија го загуби животот во тешка несреќа на работно место во близина на селото Требеништа, во општина Дебрца, информираат од Министерството за внатрешни работи.

Според МВР, на 19 декември 2025 година околу 16:10 часот во СВР Охрид било пријавено дека за време на изведување работни активности на трафостаница, врз Х.И. (44) од градот Либражд, Албанија, паднала работна машина – пумпа за бетон.

Мажот се здобил со тешки телесни повреди и со патничко возило бил пренесен во близина на аеродромот во Охрид, каде што бил преземен од екипа на Итната медицинска помош. И покрај укажаната помош, лекарите констатирале смрт.

На местото на несреќата извршен е увид од јавен обвинител, полициски службеници и претставници на Државниот инспекторат за труд. Надлежните институции преземаат мерки за утврдување на причините за несреќата и евентуална одговорност.