Украински дронски напад врз руската Волгоградска област – оштетена енергетска и транспортна инфраструктура
Во текот на ноќта, при украински напад со беспилотни летала врз јужната руска област Волгоград, бил оштетен далекoводот и избувнал пожар во зграда на железничката станица Арчеда, соопшти регионалната управа во понеделникот.
Еден од соборените дронови паднал директно на шините во близина на станицата, но според изјавата на гувернерот на областа, Андреј Бочаров, нема пријави за сериозна штета на пругата.
Руската државна новинска агенција ТАСС јави дека неколку регионални возови имале доцнење во сообраќајот, а привремено биле запрени и летовите на аеродромот во Волгоград – административниот центар на регионот. Според информациите од руската агенција за цивилна авијација „Росавијација“, летовите се нормализирани по неколку часа прекин.
Руското Министерство за одбрана информираше дека нејзините сили во текот на ноќта собориле вкупно 61 украински дрон, од кои шест над Волгоградската област. Министерството објави само податоци за бројот на уништени дронови, без да наведе колку биле вкупно испратени од Украина.
Гувернерот Бочаров нападот го опиша како „масовен“, насочен кон енергетската и транспортната инфраструктура, која според властите, претставува критична цел за украинските сили.
Од страна на Киев засега нема официјална изјава. Украина, сепак, во повеќе наврати потврди дека ги смета руските објекти од ваков тип – особено оние во внатрешноста на Русија – за легитимни цели во рамки на нејзините напори за одбрана и нарушување на логистичките канали на Москва. Волгоградската област се наоѓа на релативно блиска оддалеченост од украинската граница и претставува важна точка за руската воена инфраструктура.
