Што се случува при мозочен удар – симптоми и предупредувања по случајот со српскиот министер Дарко Глишиќ
Мозочниот удар што го погоди српскиот министер Дарко Глишиќ и го натера да ја прекине службената тура повторно ја отвори темата за сериозноста на оваа состојба и потребата од брза реакција при првите симптоми.
Според лекарите, еден од главните причинители на мозочен удар е хипертензијата – зголемениот крвен притисок кој често не дава предупредувачки знаци, но може да предизвика тешки последици. Дополнителни ризични фактори се пушењето, дебелината, недостатокот на физичка активност и дијабетесот, кои се сè почесто присутни и кај помладата популација.
Клучни симптоми на мозочен удар:
Ненадејна асиметрија на лицето – едната страна се спушта или се искривува
Потешкотии со говорот – нејасен или невозможен говор
Слабост или трнење во раката или ногата, најчесто од една страна на телото
Заматен или изгубен вид на едно или на двете очи
Во вакви случаи, лекарите апелираат: реагирајте веднаш. Секој изгубен минут може да значи поголема и трајна штета. Побарајте итна медицинска помош или одете во најблиската здравствена установа.
Брзата интервенција е клучна за спасување на животот и намалување на последиците од мозочниот удар.
