Поранешниот премиер на Израел: Израел е сè поизолиран – она што се случува во Газа наликува на етничко чистење

Поранешниот израелски премиер Ехуд Олмерт (на функција од 2006 до 2009 година) остро ја критикуваше актуелната политика на израелската влада кон Појасот Газа, оценувајќи дека воените операции немаат јасна стратегија и дека го туркаат Израел во сè подлабока меѓународна изолација.

Во интервју за Politico, Олмерт посочи дека Израел се соочува со сериозен дипломатски раскол дури и со своите традиционални сојузници, а одговорноста за тоа, според него, ја сноси премиерот Бенјамин Нетанјаху и неговата десничарска коалиција.

„Постои сè поголем јаз меѓу ужасните злосторства што Хамас ги изврши на 7 октомври и она што денес ние им го правиме на Палестинците. Израел станува изолирана држава,“ предупреди Олмерт.

Тој додаде дека сè повеќе западни држави – меѓу кои Велика Британија, Франција и Канада – отворено го разгледуваат прашањето за признавање на палестинската државност, додека Германија е под зголемен внатрешен притисок да преземе мерки против израелските постапки во Газа.

„Го губиме она ниво на меѓународна поддршка што отсекогаш нè поврзувало со најмоќните и најпрогресивни делови од западниот свет. Она што се случува во Газа сè повеќе личи на војна за истребување,“ изјави поранешниот премиер.

Особено остро реагираше на предлогот на владата за создавање т.н. „хуманитарен град“ за жителите на Газа – концепт што, според него, не е ништо друго освен „концентрационен логор“. Олмерт оцени дека таквата идеја претставува чин на етничко чистење и нагласи дека дури и високи воени функционери во Израел изразуваат несогласување и резерва кон оваа стратегија.