Во јужната кинеска провинција Гуангдонг, од почетокот на јули досега се регистрирани повеќе од 7.000 случаи на вирусот чикунгуња, кој се пренесува преку убод од заразени комарци, јавува британскиот BBC.
Најголемиот број од случаите се откриени во градот Фошан, но заразата се проширила и во најмалку 12 други градови низ целата провинција. Иако, според извештаите, сите потврдени случаи биле со лесна клиничка слика, а дури 95 отсто од пациентите биле отпуштени од болница во рок од една седмица, ситуацијата предизвика сериозна вознемиреност кај населението.
Здравствените власти во Гуангдонг најавија дека ќе преземат итни и ригорозни мерки за сузбивање на ширењето на вирусот. Истовремено, на лицата кои покажуваат симптоми им е препорачано веднаш да се јават во најблиската здравствена установа и да се тестираат за вирусот.
Вирусот чикунгуња се пренесува со убод од инфицирани комарци, а симптомите обично вклучуваат треска, болки во зглобовите, осип, главоболка, мускулни болки и отечени зглобови. Кај поголемиот дел од пациентите состојбата се подобрува за една седмица, но кај некои може да се појават хронични болки во зглобовите кои траат со месеци, па дури и со години.
Светската здравствена организација (СЗО) во јули годинава упати повик за глобална акција со цел спречување на нови епидемии. Според епидемиолозите, тековниот бран на зараза започнал на почетокот на 2025 година на островите во Индискиот Океан, потоа се проширил во Источна Африка, Јужна и Југоисточна Азија.
Првата голема епидемија на вирусот чикунгуња беше забележана во периодот 2004–2005 година.
