Свет

Нетанјаху притиска за тотална инвазија во Газа – врвот на армијата предупредува на колапс

Израелскиот премиер Бенјамин Нетанјаху се соочува со жестоки несогласувања во највисоките редови на безбедносниот естаблишмент, откако предложи целосно заземање на преостанатите области од Појасот Газа кои не се под израелска контрола. Началникот на Генералштабот Ејал Замир остро се спротивставил на идејата на тричасовна затворена средба, предупредувајќи дека таквиот потег може да доведе до воен и хуманитарен колапс, јавува Reuters повикувајќи се на тројца израелски функционери.

Замир изразил загриженост дека целосното влегување на копнените сили би можело да ја зароби израелската армија во Газа – територија која ја напушти во 2005 година – и би ги ставило во сериозна опасност преостанатите заложници што се уште се држат од Хамас. Премиерот, според истите извори, возвратил дека армијата досега не успеала да ги ослободи заложниците и побарал поагресивен пристап.

По речиси две години жестока војна, Израел тврди дека контролира околу 75% од Газа. Воениот конфликт започна во октомври 2023 година по нападот на Хамас врз израелска територија. Од тогаш, голем дел од Газа е уништен – населението е раселено по неколку пати, а инфраструктурата е речиси целосно разрушена. Хуманитарните организации предупредуваат на масовна глад и зарази, а ОН ги опишаа како „длабоко вознемирувачки“ извештаите за можно ново проширување на офанзивата.

Министерот за одбрана Исраел Кац истакна дека армијата има право да изрази свое мислење, но подвлече дека ќе ги спроведе одлуките на владата сè додека не се исполнат дефинираните воени цели. Кабинетот на премиерот потврди дека средбата се одржала, но одби да коментира детали.

Додека Нетанјаху се залага за ескалација, јавноста сè повеќе се изјаснува за дипломатско решение. Последните анкети во Израел покажуваат растечка поддршка за прекин на огнот кој би довел до ослободување на заложниците и намалување на хуманитарната катастрофа.

Во меѓувреме, војската продолжува со интензивни воздушни напади. Само во последните 24 часа, според Министерството за здравство во Газа, загинале најмалку 135 луѓе. Вкупниот број на жртви од почетокот на конфликтот надминува 61.000, претежно цивили.

Ситуацијата на теренот е критична. Речиси 200 Палестинци, од кои половина деца, починале од глад од почетокот на војната. Хуманитарниот конвој кој носел храна бил опколен од очајни луѓе – камионот се превртел, а повеќе од 20 лица загинале. Светот сè погласно бара примирје, но преговорите во Катар минатиот месец пропаднаа.

Хамас инсистира дека секој договор мора да значи траен прекин на војната, додека израелската влада не покажува подготвеност за отстапка – што ја продлабочува поделеноста меѓу политичкиот и воениот врв и ја става иднината на регионот под уште поголем ризик.

Свет

Неочекуван пресврт во здравствената состојба на херојот од Сиднеј: Загубил многу крв, може да ја загуби раката

Ахмед ал Ахмед, минувачот кој вчера херојски успеа да го совлада и разоружа еден од напаѓачите во Бонди, изјави дека, и покрај тешките повреди и силната болка, повторно би го направил истото. Неговиот адвокат за миграции, Сем Иса, потврди дека Ахмед не жали за својот херојски чин, иако неговата здравствена состојба се влошила.

Ахмед е хоспитализиран во болницата „Сент Џорџ“ во Когара, каде се опоравува по првата операција. Тој има пет прострелни рани на левата рака, а еден куршум сè уште е заглавен во пределот на левата лопатка. Лекарите се загрижени поради сериозната загуба на крв и постои ризик дека би можел да ја изгуби раката.

Адвокатот истакна дека Ахмед е скромен човек кој не бара медиумско внимание и постапил од чувство на човечка и морална должност. По добивањето на австралиско државјанство во 2022 година, тој се чувствувал обврзан да ѝ помогне на заедницата која го прифатила.

Неговите родители велат дека, и покрај повредите, Ахмед е добро расположено. Мајката призна дека плачела од гордост кога дознала дека синот спасил животи, а таткото додаде дека Ахмед му се заблагодарил на Бога што им помогнал на невини луѓе.

Австралискиот премиер Ентони Албаниз и премиерот на Нов Јужен Велс, Крис Минс, го пофалија херојството на Ахмед, а поддршка упати и американскиот претседател Доналд Трамп. Во знак на солидарност, преку GoFundMe кампања се собраа над половина милион долари за неговото лекување и опоравување.

Ахмед ал Ахмед (44), сириско потекло, живее во Австралија од 2006 година, е сопственик на мал бизнис и татко на две мали ќерки. Неговото семејство и блиските велат дека без двоумење би го жртвувал сопствениот живот за да ги спаси другите.

Извор: newz24live.com

Свет

Судски дуел помеѓу Трамп и Би-би-си

Доналд Трамп тргна во силен правен противнапад против британскиот медиумски гигант Би-Би-Си (BBC), поднесувајќи тужба „тешка“ неверојатни 5 милијарди долари. Поранешниот и иден американски претседател тврди дека реномираната емисија „Панорама“ извршила брутална медиумска манипулација со неговиот говор од 6 јануари 2021 година, свесно искривувајќи ја вистината пред очите на светската јавност.

Во тужбата поднесена пред судот во Флорида, правниот тим на Трамп го обвинува британскиот јавен сервис за клевета и грубо кршење на законите за трговски практики. Срцето на спорот е контроверзниот документарец емитуван непосредно пред изборите во САД во 2024 година. Според адвокатите, Би-Би-Си извршиле „намерно, злонамерно и измамничко манипулирање“ со зборовите на Трамп, лепејќи две посебни изјави изречени во временски интервал од 50 минути за да создадат привид на директен повик за насилство.

„Морав да го направам ова. Тие измамија. Ги сменија зборовите што излегоа од мојата уста“, изјави решително Трамп пред новинарите.

Иако Би-Би-Си призна дека монтажата создала „лажен впечаток“, тие упорно одбиваат да исплатат отштета, тврдејќи дека нема правна основа за клевета. Сепак, скандалот веќе предизвика вистински институционален земјотрес во Велика Британија. По протекувањето на интерна белешка во која се критикува новинарската етика на прилогот, оставки поднесоа најмоќните луѓе во куќата: генералниот директор Тим Дејви и директорката на информативната програма Дебора Тернес.

Правната одбрана на Би-Би-Си се потпира на аргументот дека документарецот бил наменет исклучиво за британскиот пазар и дека Трамп не претрпел штета, со оглед на неговата победа на изборите. Сепак, тужбата на Трамп нуди поинаква перспектива.

Трамп тврди дека постоеле лиценци за глобално прикажување. Се нагласува дека жителите на Флорида масовно го гледале спорниот материјал преку VPN мрежи и платформата BritBox. Тужбата инсистира дека угледот на Трамп бил цел на напад токму во неговата база, Флорида.

Останува да се види дали американскиот суд ќе го прифати овој случај кој ветува дека ќе стане еден од најскапите и најзначајните судски процеси во историјата на односите меѓу политиката и медиумите.

Свет

Силна експлозија во Франција – петмина повредени

Силна експлозија ја погоди приземјето на една помала зграда во градот Тревос, во близина на Лион, вечерва околу 18 часот, при што пет лица се повредени, објави „Фигаро“.

Експлозијата предизвикала делумно уривање на фасадата на зградата, а спасувачките екипи брзо интервенирале. Жртвите добиле медицинска помош на лице место, додека педесет пожарникари со 36 возила и медицински служби биле мобилизирани за да им пружат помош на повредените.

Како мерка на претпазливост, средното училиште лоцирано во непосредна близина било веднаш евакуирано. Локалните власти започнаа истрага за да се утврди точната причина за експлозијата.