Украинскиот претседател Володимир Зеленски денеска го посети северниот пограничен регион Суми, каде лично им додели државни одликувања на украинските војници кои ја бранат оваа стратешки важна област, која постојано е под закана од руски напади и упади.
„Ви благодарам за вашата служба, за одбраната на Украина и нашиот народ. Посебно ви благодарам за операцијата во Курск и за многу храбрите чекори“, им се обрати Зеленски на војниците, алудирајќи на неодамнешните украински противнапади преку границата во руската Курска област.
Суми, која директно се граничи со Русија, е зона на чести воени судири. Во последната година, покрај одбранбените активности, украинските сили сѐ почесто изведуваат офанзиви на руска територија, што го потврди и самиот претседател со спомнувањето на операцијата во Курск.
За време на посетата, Зеленски одржа состанок и со локалните воени команданти, каде разговарал за оперативната состојба и одговорностите на единиците во регионот. Иако официјалниот Киев не соопшти детали за актуелните операции, посетата на Зеленски носи јасна порака: Суми останува критичен дел од украинската стратегија за одбрана – и за отпор, и за притисок.
