Железници Транспорт АД Скопје денеска официјално ја врати во функција четвртата електрична локомотива која беше надвор од употреба од 2023 година поради долготрајно неодржување од страна на претходното раководство. Станува збор за една од четирите локомотиви набавени во 2018 година, кои подолго време беа во нефункционална состојба.
Со последната сервисирана локомотива, вкупниот број на возни средства во функција се искачи на 13 – доволно, според компанијата, за покривање на потребите од внатрешниот и меѓународниот железнички сообраќај. Особено значајно е што сега целосно се задоволуваат потребите на товарниот (карго) железнички сообраќај, што не беше случај пред една година кога речиси и да немаше функционални локомотиви за оваа намена.
„Со оваа реконструкција и активирање на возниот парк се потврдува заложбата за стабилен и конкурентен железнички транспорт во земјава“, велат од Железници.
Официјални претставници нагласуваат дека инвестирањето во железничката инфраструктура и модернизацијата на возниот парк е еден од стратешките приоритети на Владата. Потврда за ова се и големите проекти како изградбата и модернизацијата на железничкиот Коридор 8, како и проектот за брза пруга.
Дополнително, годинава беше завршена и пуштена во употреба железничката делница Куманово – Бељаковце, на која веќе сообраќа патнички воз, што ја потврдува динамиката на реализирање на клучни инфраструктурни зафати.
