Францускиот претседател Емануел Макрон започна постапка за укинување на визните олеснувања за алжирските функционери и дипломати, во една од најострите дипломатски ескалации меѓу Париз и Алжир во последниве години. Со овој потег, Макрон формално побара поништување на билатералниот договор од 2013 година, кој дозволуваше безвизен престој до 90 дена за носителите на службени и дипломатски пасоши од Алжир.
Тензиите дополнително се продлабочија по најавата на францускиот министер за надворешни работи Жан-Ноел Баро за депортација на алжирски дипломати без важечки визи, откако Алжир претходно протера неколку француски државни службеници. Алжир возврати дека токму Франција инсистирала на потпишувањето на договорот во 2013 година, и дека сега ќе ја искористи оваа “прилика за повлекување”.
Влошувањето на односите доаѓа во сенка на повеќегодишни тензии, вклучително и одлуката на Париз минатата година да го признае суверенитетот на Мароко врз Западна Сахара – регион што Алжир силно го поддржува како независен, преку Фронтот Полисарио.
Дипломатската криза е продлабочена и по апсењето на двајца француски државјани во Алжир – писателот Буалем Сансал и новинарот Кристоф Глезис, кои се обвинети за “подривање на националното единство” и “пропагирање тероризам”, откако јавно ја поддржаа мароканската страна во конфликтот за Западна Сахара.
Во позадина на сè стои и чувствителната внатрешна ситуација во Франција: Алжирците се најголема имигрантска заедница во земјата, а милиони Французи имаат алжирско потекло – што ја прави секоја дипломатска криза длабоко политички наелектризирана и на домашен терен.
