Стјуардеса со петгодишно искуство, позната на TikTok под псевдонимот @cherdallas, ги предупреди патниците на неочекувани хигиенски ризици поврзани со миењето раце во тоалетите на авионите.
Во својата видеообјава што наиде на бројни реакции, Cher открива дека мијалниците во авионските тоалети често се валкани и запоставени, а понекогаш дури се користат и во ситуации како повраќање. Чистењето на тие делови, според неа, е минимално или речиси и да не постои.
Таа истакнува дека водата која доаѓа од чешмите не е безбедна – не само што не е за пиење, туку содржи и висока концентрација на бактерии, што ја прави сомнителна и за едноставно миење раце. Cher забележува и лични последици – водата ѝ ги оштетува ноктите, правејќи ги кршливи и слаби.
Дополнително, таа предупредува дека ретко се чистат и други делови од авионот, како што се ролетните на прозорците и самите тоалетни шолји. Во истата насока, стјуардесата им препорачува на патниците да не ја соблекуваат обувката за време на летот, бидејќи теписите на подот собираат бројни бактерии и се чистат многу ретко – обично не и меѓу два лета.
Ова искрено предупредување отвори жестока дискусија на социјалните мрежи – дел од корисниците изразија згрозеност и разочараност од хигиенските услови во авионите, додека други споделија свои совети за самоодбрана од нечистотија, како употреба на алкохолни марамчиња и дезинфициенси.
Иако безбедносните стандарди во авиоиндустријата се високи, објавата на Cher укажува дека кога станува збор за хигиената – има уште многу простор за подобрување. Патниците се повикани да бидат внимателни и сами да преземат мерки за сопствената заштита за време на лет.
