Тулси Габард, директорка на Националната разузнавачка служба (DNI) и блиска соработничка на претседателот Доналд Трамп, јавно изјави дека лично верува во постоење на вонземски живот. Во интервју за подкастот „Pod Force One“ со новинарката Миранда Девајн, Габард истакна дека нејзиното убедување се темели на лични ставови и сознанија, но и на чувствителноста на функцијата што ја извршува.
„Имам пристап до обемна класифицирана документација. Заради природата на мојата улога, морам да бидам крајно внимателна со тоа што го обелоденувам,“ рече Габард, одговарајќи потврдно — со едноставно „да“ — на прашањето дали верува во постоење на вонземски интелигенции и неидентификувани воздушни феномени (UAP).
Темата за НЛО, денес формално наречени UAP, со години ја опкружуваат шпекулации и теории на заговор. Во последниот период неколку американски конгресни комисии отворија истраги за да утврдат колку навистина знае федералната влада за тие феномени. Лани, Пододборот за национална безбедност при Претставничкиот дом организираше серија јавно пренесувани сослушувања со барање за поголема транспарентност од Пентагон.
Габард потенцираше дека нејзиниот кабинет во моментот не располага со информации за UAP кои можат да бидат јавно објавени, но вети „целосна транспарентност“ веднаш штом условите го дозволат тоа. Таа раководи со координацијата на вкупно 18 американски разузнавачки агенции, чии архиви и извештаи сè повеќе се под лупа на јавноста, особено поради растечкиот интерес за прашањето за постоење живот надвор од Земјата.
Во разговорот, директорката на DNI се осврна и на случаите со мистериозни дронови кои минатата година беа забележани над Њу Џерси и други делови од земјата. „Постојат официјални објаснувања, но има и многу нејаснотии,“ рече таа, додавајќи дека истрагите продолжуваат.
Габард заклучи дека разузнавачката заедница останува посветена на потрагата по вистината за секој необјаснет објект во американскиот воздушен простор и увери дека јавноста ќе ја добие целосната слика — веднаш штом тоа не претставува безбедносен ризик.
