Во магичната атмосфера на Големо Езеро на планината Баба, на 2218 метри надморска височина, годинава ќе се одржи уникатен театарски настан под отворено небо. На 9 август, со почеток во 22 часот, љубителите на уметноста ќе имаат можност да ја проследат претставата „Ноќта кога ја убив месечината“ – проект насловен како театар „високо под ѕвездите“.
Настанот се одржува во организација на НУ Национален парк Пелистер – Битола, НУ Народен театар Битола и НУ Камерен оркестар Битола, кои заеднички ја создаваат оваа несекојдневна културна авантура, во синергија со природата и под отворено небо.
Сите посетители се повикуваат да бидат добро подготвени: носењето планинарска опрема, како и соодветни патики или чевли е задолжително, поради специфичната локација и теренот до Големо Езеро.
Настанот претставува совршен спој на културата, планинскиот дух и љубовта кон природата, а се очекува голем интерес од домашната и странската публика. Претставата најавува мистична и емотивна ноќ за паметење – таму каде што сцената е езерото, ѕидови се ѕвездите, а месечината… главна тема.
