Три големи и една средна банка во земјава започнаа со намалување на банкарските надоместоци, информираше денеска гувернерот на Народната банка, Трајко Славески. Ова следува по апелот на централната банка до деловните банки да ги намалат трошоците за граѓаните и компаниите при користењето на платежните услуги.
Според Славески, дел од банките веќе почнале да нудат бесплатни трансакции преку електронско и мобилно банкарство – особено кога трансферот се одвива меѓу сметки во иста банка, услуга за која претходно се наплатуваа надоместоци. Некои банки ги намалиле и трошоците за подигнување готовина на шалтер, издавање потврди, преписи на документи и други услуги.
„Ова е позитивен чекор кон подобрување на пристапноста до банкарски услуги по разумни цени. Очекуваме и останатите банки да се приклучат на оваа иницијатива во текот на август“, изјави Славески.
Покрај ова, Народната банка најави и законска иницијатива за олеснување на пристапот до платежна сметка со основни функции. Во моментов, само 140 такви сметки се отворени во земјава, што според институцијата покажува дека целта на мерката не е постигната.
Меѓу предложените измени се:
овозможување на дозволено пречекорување на сметката, можност граѓаните да ја користат основната сметка без да ги затвораат останатите денарски сметки.
„Овие измени се насочени кон зголемување на инклузивноста во финансискиот систем. Многу граѓани се одвратени од отворање основна сметка поради строгите ограничувања“, додаде Славески.
Гувернерот изрази очекување дека и останатите помали банки ќе го следат примерот на големите и ќе започнат со намалување на банкарските провизии. Сепак, не посочи конкретни проценти за намалувањето, бидејќи секоја банка има сопствен тарифник и ги информира клиентите индивидуално.
