Зеленски ги објави приоритетите на украинската одбрана: Домашно оружје, дигитализација и реформа на персоналот
Претседателот на Украина, Володимир Зеленски, ги претстави петте главни приоритети на украинското Министерство за одбрана, нагласувајќи ја потребата од модернизација, поедноставување на процедурите и зајакнување на домашното производство на оружје.
Во своето видео-обраќање до нацијата, Зеленски соопшти дека во областа Суми бил информиран од министерот за одбрана Денис Шмигаљ за процесот на реформа на одбранбениот сектор. Прв приоритет, како што истакна, е зголемувањето на бројот на нарачки за украинските производители на оружје, со цел најмалку 50 проценти од вооружувањето на фронтот да биде од домашно потекло.
„Неопходно е да се поттикне домашната индустрија. Нашите сили на фронтот треба да се потпираат на украинско оружје“, порача Зеленски.
Вториот приоритет се однесува на дигитализацијата – развој на напредни дигитални услуги и системи, вклучително и платформата Delta, која има клучна улога во координацијата на воените операции. Претседателот нагласи и дека мора да се намали бирократијата и да се воспостави јасна, ефикасна комуникација со бригадите и единиците на теренот, особено во однос на нивните итни потреби.
Петтиот приоритет, како што рече, се однесува на решавање на прашањата поврзани со човечките ресурси во вооружените сили.
„Овој проблем ни е добро познат на сите. Министерството за одбрана, заедно со военото раководство, мора да најде решение“, потенцираше Зеленски, пренесува агенцијата „Укринформ“.
Во рамки на посетата на Сумската област, Зеленски одржа состанок со врховниот командант на вооружените сили, генерал-полковник Олександар Сирски, министерот Шмигаљ и командантот на воздухопловните сили, Олег Апостол. По повод годишнината од почетокот на воената операција во регионот Курск, претседателот се сретна и со припадници на 225. јуришен пук.
