Пожарот што се шири на повеќе од 16.000 хектари на југот на Франција однесе најмалку еден живот, повреди 19 пожарникари и шест цивили, и уништи десетици домови.
„Огнот е ограничен, но не и ставен под контрола. Сè уште има жаришта и пожарот нема да биде целосно под контрола најмалку до недела навечер“, изјави Кристоф Магни за телевизијата BFM TV.
Локалните патишта во регионот покрај границата со Шпанија се повторно отворени, но влезот во зоната на пожарот е забранет поради ризик од повторно активирање, соопшти француската пожарна.
Француските власти го припишуваат пожарот на климатските промени, а локалните виноградари предупредуваат дека дел од нивните лозја, кои обично служат како природен протипожарен штит поради задржување на влага, се раскопани пред пожарот поради намалена потрошувачка на вино и субвенции.
Според податоците на Европската комисија, од почетокот на годинава во Европа изгореле 353.000 хектари во 1.478 пожари.
Служба на ЕУ за климатски промени Copernicus минатата недела соопшти дека јули 2025 бил трет најтопол јули измерен на Земјата, со рекордна температура од 50,5 степени Целзиусови во Турција.
Најтоплите јули досега биле регистрирани во 2023 и 2024 година, што дополнително ја нагласува кризата со глобалното затоплување и неговото влијание врз зачестеноста и интензитетот на шумските пожари.
