Европската Унија и Украина изнесоа заеднички предлог за договор за прекин на огнот со Русија, кој треба да послужи како основа за претстојните преговори меѓу американскиот претседател Доналд Трамп и рускиот лидер Владимир Путин, објави „Волстрит џурнал“, повикувајќи се на европски извори.
Во текот на состанокот со високи американски претставници во Велика Британија, ЕУ го отфрли предлогот за размена на делови од регионот Донецк под контрола на Украина како услов за прекин на огнот. Европските претставници потенцираат дека прекин на огнот мора да се постигне пред какви било други чекори и дека териториите може да се разменуваат само на реципрочна основа.
„Не може да се започне процесот со откажување од територија во средината на борбата“, изјави еден европски преговарач.
Рускиот претседател Владимир Путин бара Украина да врати делови од регионот Донецк под руска контрола за да се согласи на прекин на огнот, а замрзнување на линиите на фронтот се очекува и во регионите Запорожје и Херсон.
Некои европски претставници предупредуваат дека доколку Украина се откаже од целиот регион Донецк, Русија треба да се повлече од окупираните делови од Запорожје и Херсон, со што би се постигнала реципрочна размена на територии.
