Британија: Не му веруваме на Путин, но ја поддржуваме Украина во преговорите за мир

Британскиот премиер Кеир Стармер ја поддржува иницијативата на американскиот претседател Доналд Трамп за завршување на војната во Украина, но истовремено нагласува дека Киев мора да биде целосно вклучен во сите договори за прекин на огнот.

Во Украина владее страв дека Трамп и рускиот претседател Владимир Путин на средбата во петок на Алјаска би можеле да се обидат да наметнат услови за завршување на конфликтот. Сепак, повеќе европски сојузници на Украина денеска повикаа Киев да биде директно вклучен во секој мировен договор.

„Не му веруваме на претседателот Путин, но ја поддржуваме Украина, претседателот Трамп и европските земји додека влегуваме во овие преговори“, изјави портпаролката на британскиот премиер за новинарите.

„Мирот мора да се гради заедно со Украина, а не да ѝ се наметнува, и нема да ја наградуваме агресијата ниту ќе прифатиме компромис во врска со суверенитетот. Украина сама ќе ја одлучи својата иднина, а ние ќе ја поддржуваме на секој чекор.“