Пред претстојниот состанок меѓу Доналд Трамп и Владимир Путин на 15 август на Алјаска, се обнови дебатата за можните територијални отстапки во Украина. Генералниот секретар на НАТО, Марк Руте, изјави дека преговорите за териториите под руска контрола се неизбежни, но потенцираше дека Украина е суверена држава која сама ќе ја одлучи својата иднина.
„Во моментов мораме да прифатиме дека Русија контролира дел од украинската територија,“ рече Руте во интервју за американската телевизија ABC. Тој додаде дека по прекинот на огнот ќе се постави прашањето како ќе се решаваат територијалните прашања и безбедносните гаранции, потенцирајќи дека контролата на Русија над некои области не значи и правно признавање, споредувајќи го тоа со долгогодишниот став на Западот кон советската окупација на балтичките држави.
Руте го пофали ангажманот на Трамп и го оцени состанокот како можен важен чекор кон пошироки мировни преговори, додека украинскиот претседател Володимир Зеленски досега не е поканет и категорички го одбива секое отстапување на украинска територија. Тој нагласи дека одлуките за Украина мора да се носат со нејзино активно учество и предупреди на можноста за измама од страна на Москва.
Украинскиот амбасадор во Германија, Алексej Макејев, потенцира дека во фокусот не смеат да бидат само териториите, туку и судбината на милионите Украинци кои живеат под руска окупација и кои се изложени на тешки кршења на човековите права.
Од друга страна, европските држави се загрижени дека Украина и интересите на Европа може да бидат изиграни на состанокот на Алјаска. Европската комесарка за надворешни работи Каја Калас истакна дека секој договор меѓу САД и Русија мора да ги вклучува Украина и ЕУ и дека руската агресија не смее да биде наградена.
Во меѓувреме, американскиот потпретседател Џ.Д. Ванс и други официјални лица најавија намалување на финансиската поддршка за Украина, нагласувајќи дека се бара мирно решение и крај на конфликтот, со што САД повеќе не сакаат да ја финансираат војната.
Состанокот меѓу Трамп и Путин ќе се одржи без директно учество на Зеленски, но не е исклучено тој да биде поканет, одлучувајќи го американскиот претседател.
