Млада жена од тетовското село Копанце починала во раните утрински часови во Тетовската болница, а случајот е предмет на истрага од надлежните институции.
Според информациите од болницата, пациентката била примена во итната медицинска помош околу 03:00 часот во тешка состојба и потоа префрлена на Инфективното одделение, каде што починала. Неофицијално, таа претходно примала терапија во приватни болници, пред да биде примена во јавната установа.
Од Министерството за здравство соопштија дека е инициран инспекциски надзор од Државниот санитарен и здравствен инспекторат за утврдување на фактичката состојба, а јавноста ќе биде известена по завршувањето на постапката.
МВР информираше дека во 03:20 часот, член од семејството на починатата пријавил дека пациентката била примена на лекување претходниот ден во 19:00 часот, но наводно не ѝ била укажана соодветна медицинска помош. Поради тоа, формиран е тим за испитување на настанот, кој ќе работи во координација со дежурен јавен обвинител и полициски службеници од СВР Тетово.
Точната причина за смртта ќе биде утврдена по извршување на обдукција.
