Македонија

ВЛЕН: Бујар Османи е пример за неефикасна и незаконска работа

ВЛЕН обвини дека политичката кариера на Бујар Османи е обележана со лични интереси и незаконско постапување, а не со работа во корист на граѓаните. Партијата потсети на извештаите на Државниот завод за ревизија, кои содржат сериозни забелешки за периодот кога Османи бил министер за здравство (2008–2011).

Во ревизорскиот извештај за 2009 година, објавен во 2010, се наведува незаконска употреба на службени возила без официјални одлуки и месечни извештаи, исплата на 4,58 милиони денари за деривати без соодветна проверка и усогласување на фактурите, како и сервисирање возила без докази и исплата од 1,4 милиони денари без записници за квалитетен прием.

Ревизорите утврдиле и незаконски вработувања преку агенции, ангажмани за проекти кои не биле предвидени со систематизацијата, како и сомнителни награди за членови на комисијата за јавни набавки во износ од 410 илјади денари, исплатени без докази за извршена работа.

„Овој извештај е доказ дека Османи не само што не оставил никаков траен развоен белег во здравствениот систем, туку напротив, неговото раководење било пример за незаконско трошење на јавни пари,“ велат од ВЛЕН.

Од партијата додаваат дека истиот човек, кој добил негативни извештаи од државните ревизори, сега бара доверба од граѓаните на Општина Чаир за, како што велат, да продолжи со незаконските практики на локално ниво. „Чаир не смее да стане засолниште за незаконската работа на Бујар Османи, додека неговата партија е во опозиција,“ порачаа од ВЛЕН.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.