Русија распоредува војници за нови офанзивни операции во Украина, изјави украинскиот претседател Володимир Зеленски, предупредувајќи дека нема знаци за подготвување на прекин на огнот или крај на конфликтот.
„Денеска добив извештај од разузнавачките служби и военото раководство за тоа на што смета Путин и за што навистина се подготвува. Тоа се воени подготовки, а не прекин на огнот или крај на војната,“ рече Зеленски во своето ноќно обраќање.
Тој додаде дека Русија преместува дел од своите единици, особено во Запорожката област, за нови напади на украинска територија. Според портпаролот на украинската армија за јужниот фронт, Владислав Волошин, се работи за насочени подготовки за засилени офанзиви.
Изјавата доаѓа по добиената дипломатска поддршка од Европа и НАТО, во период на стравувања дека претстојниот состанок меѓу Доналд Трамп и Владимир Путин на Алјаска би можел да донесе обиди за наметнување услови за завршување на три и пол годишната војна.
Зеленски во понеделникот остварил телефонски разговори со индискиот премиер Нарендра Моди и саудискиот престолонаследник Мохамед бин Салман, повикувајќи на ограничување на извозот на руски енергенси за да се намали способноста на Москва да го финансира продолжувањето на војната.
„Потребно е лидерите со реално влијание врз Русија да делуваат. Санкциите мора да останат додека Украина не добие безбедносни гаранции,“ нагласи Зеленски.
Паралелно, Кремљ соопшти дека претседателот Путин разговарал со лидерите на Кина, Индија, Бразил и неколку поранешни советски републики за своите контакти со САД во врска со војната во Украина.
