Администрацијата на американскиот претседател Доналд Трамп размислува за формирање специјални сили за брзо реагирање кои би се распоредувале во градовите при протести и нереди, објави „Вашингтон пост“ повикувајќи се на внатрешни документи на Пентагон.
Според планот, 600 војници ќе бидат во постојана готовност и подготвени за транспорт до целната локација во рок од еден час. Тие ќе бидат поделени во две групи од по 300 војници, распоредени во воени бази во Алабама и Аризона.
За одржување на овие сили би биле потребни стотици милиони долари, особено ако за нивно брзо распоредување се користат воени авиони што ќе бидат постојано достапни.
Документите содржат и анализа на можните општествени последици од ваквата програма, која најрано би можела да стартува во фискалната 2027 година преку буџетот на Пентагон. Не е прецизирано дали проектот би започнал порано доколку се обезбедат алтернативни извори на финансирање.
„Вашингтон пост“ наведува дека не е познато дали министерот за одбрана Пит Хегсет бил запознаен со проектот, додека портпаролите на Пентагон одбиле да дадат коментар.
