Арктикот во фокусот: Трамп и Путин пред предизвик поради стратешки ресурси и воени тензии

Самитот на рускиот и американскиот претседател, Владимир Путин и Доналд Трамп, закажан за 15 август на Алјаска, е фокусиран на Украина, но во позадина се наоѓа уште поважна тема – Арктикот. Ова огромно подрачје богато со нафта, гас, злато и други ресурси, како и со стратешки морски патишта, станува клучна точка во американско-руските односи, со се поголемо присуство на Кина и други држави.

Трамп најави дека ќе разговара за Арктикот со Путин, а од Москва е потврдено дека дневниот ред ќе го вклучи овој регион, каде што владее интензивна напнатост со потенцијал за вооружен судир. Воената активност на двете страни се зголемува, но Арктикот исто така нуди можности за заедничко истражување и експлоатација на ресурси.

Арктичките вежби „Arctic Edge“ на Алјаска, кои траат од 1 до 31 август, вклучуваат единици на американското воздухопловство, копнена војска, морнарица и маринци, заедно со сили од Велика Британија и Данска. Целта е демонстрација на подготвеност, контрола на територија и пресретнување на потенцијални закани, особено од Русија. Паралелно започнува и вежбата „Polar Dagger“ со елитни американски команди.

Русија контролира 53% од арктичката обала и Арктикот е клучен за руската економија и стратегија. Кремљ ги смета американските и НАТО активности како предизвик, а руските официјални лица предупредуваат дека зголеменото воено присуство го зголемува ризикот од инциденти и ескалација на судири.

Спорот дополнително се продлабочува околу границите на арктичкиот континентален шелф. Русија тврди дека нејзиниот суверенитет е потврден од страна на ООН, додека САД, кои не се страна во Конвенцијата на ООН за право на море, еднострано го прошируваат својот шелф, барајќи право на милион квадратни километри богати со ресурси.

Додека Кремљ очекува договор со Трамп, испраќа сигнал дека околу Арктикот нема покорување. Рускиот министер за надворешни работи Лавров истакнува дека Русија останува отворена за прагматска соработка, но Арктикот тешко ќе биде заобиколен во преговорите овој петок.