Вечерва, во Ѓорче Петров, Орце Ѓорѓиевски заедно со Александар Стојкоски и пратеникот Бојан Стојаноски, најави целосна реконструкција на паркот во центарот на општината.
„Овој парк зрачи со топлина, преполн е со луѓе, детска игра и смеа. Тука се чувствува вистинскиот дух на заедништвото. Затоа, веднаш по големата победа на локалните избори, ќе започнеме со неговата реконструкција“, изјави Ѓорѓиевски.
Тој истакна дека ќе се вложат сериозни напори за изградба на нови и реконструкција на постоечките паркови, со цел враќање на нивниот сјај и создавање повеќе јавни зелени простори за граѓаните.
„Овие места се каде што се создаваат спомени, каде што децата растат, семејствата се собираат, а соседите стануваат пријатели. Ќе се бориме да создадеме повеќе вакви простори кои ќе го разубавуваат секојдневието на скопјани“, порача Ѓорѓиевски.
