Македонија во првите два месеца од почетокот на издавањето гаранции за потекло на електрична енергија издала вкупно 107.666 вакви потврди, соопшти Националниот оператор на пазарот на електрична енергија (МЕМО).
Регистарот на гаранции за потекло беше успешно воспоставен во април годинава, а на 26 мај МЕМО официјално ги издаде првите гаранции за електроенергија произведена од хидроелектрани на државната компанија „Електрани на Северна Македонија“ (ЕСМ). Во јуни беа издадени 56.620 гаранции за хидроелектрани, а во јули 51.046 за фотонапонски електрани.
Гаранциите за потекло се однесуваат на осум електрани – хидроелектраните „Козјак“ и „Света Петка“ и соларните централи „Осломеј“, „Долани солар“, „ЕВН солар 1“, „Штип солар“, „Црн камен 1“ и „Црн камен 2“.
МЕМО истакнува дека системот е усогласен со националните и европските прописи, обезбедувајќи безбеден и стандарнизиран процес за издавање, пренос и активирање на гаранции за потекло. Овие електронски документи им овозможуваат на потрошувачите да добијат потврда дека одреден дел од електричната енергија што ја користат е произведена од обновливи извори.
Системот е воспоставен во соработка со компанијата Grexel, а правилата се усогласени со Европскиот систем за енергетска сертификација (EECS) и стандардите на Асоцијацијата на тела за издавање гаранции за потекло (AIB).
Секретаријатот на Енергетската заедница работи на регионален систем за гаранции за потекло во девет земји, а досега вакви регистри покренаа Албанија, Црна Гора, Грузија, Република Српска и Северна Македонија.
