Компанијата Meta Platforms, сопственик на апликацијата WhatsApp, ја обвини Русија дека се обидува да ја блокира нејзината услуга за повеќе од 100 милиони луѓе, поради тоа што нуди право на заштитена и приватна комуникација.
Од WhatsApp соопштија дека пораките и повиците на платформата се целосно заштитени со енкрипција „од крај до крај“, што значи дека „никој надвор од разговорот, дури ни WhatsApp, не може да ги чита, слуша или споделува“.
Руските власти веќе почнале да ограничуваат одредени повици преку WhatsApp и Telegram, обвинувајќи ги странските платформи дека одбиваат да споделат информации со полицијата во случаи на измами и тероризам.
„WhatsApp овозможува приватност и се спротивставува на обидите на владите да го нарушат правото на безбедна комуникација, поради што Русија се обидува да ја ограничи услугата за повеќе од 100 милиони руски граѓани“, наведуваат од компанијата, додавајќи дека ќе продолжат да се борат шифрираната комуникација да остане достапна насекаде, вклучително и во Русија.
