Велика Британија го намали обемот на предложениот мировен ангажман во Украина, заменувајќи го првичниот план за распоредување на 30.000 војници со помала и понасочена операција. Одлуката ја потврди британскиот премиер Кир Стармер по виртуелниот состанок со американскиот претседател Доналд Трамп и лидерите на ЕУ, пренесува The Times.
Стармер изјави дека европските држави сега поддржуваат „реалистична мисија“ која би започнала по постигнување договор за прекин на огнот и би се фокусирала на воздушни патроли над западна Украина, деминирање на Црното Море и помош при обука на украинските сили.
Ревидираната стратегија следува откако некои европски влади изразиле воздржаност да испратат голем број војници за заштита на украинските пристаништа и градови, поради страв од ескалација на конфликтот. Наместо распоредување на фронтот, коалицијата ќе обезбедува логистичка поддршка, вооружување и обука во западна Украина, каде ризикот од напади е помал.
Планираниот мандат на мисијата вклучува одвраќање на руските воздушни активности со патроли на борбени авиони Typhoon и F-35, помош за обновување на меѓународните летови, како и отстранување на поморски мини за повторно отворање на трговските морски рути.
Британија, исто така, ги поттикнува партнерите од ЕУ да ја конфискуваат замрзнатата руска имотна вредност од 243 милијарди евра, иако консензус сè уште не е постигнат. Стармер нагласи дека на преговорите, одржани два дена пред планираната средба меѓу Трамп и рускиот претседател Владимир Путин на Алјаска, е постигнат „вистински напредок“ и дека меѓународните граници „не можат и не смеат да се менуваат со сила“.
