Македонија

ВЛЕН: ДУИ е главен промотор на „српскиот свет“ во Македонија

Скопје, 14 август – „ДУИ со години е клучен политички партнер на структури кои ја промовираат идејата за „српскиот свет“ во Северна Македонија. Нивната улога не е случајна, туку е целосно намерна, систематска и штетна за државните интереси.

Влезот на М-ТЕЛ на домашниот пазар се случил во време кога сите клучни министерства за економски и финансиски сектор биле под контрола на ДУИ. Без нивната политичка поддршка, државната српска телекомуникациска компанија не би добила лиценца и пристап до стратешката комуникациска инфраструктура.

Исто така, обидите за продор на српски и црногорски капитал во онлајн казина биле реализирани под целосен покровителство и поддршка на министрите од ДУИ во минатата влада. Доколку не се случеше промена на власта, овој српски инвестициски проект веќе ќе беше реалност.

Контактите на Али Ахмети и Бујар Османи со режимот на Александар Вучиќ, лично и преку неговите министри, резултирале со политички и економски договори во корист на Белград, а на штета на интересите на Македонците и Албанците.

Бујар Османи, како претседавач на ОБСЕ, имал директна улога во донесување ставови кои служеле на Србија, вршејќи притисок врз Косово, наместо да ја штити правната позиција на Приштина.

Приоритетите во инфраструктурата биле пренасочени, при што КОРИДОРОТ 8 бил занемарен, додека КОРИДОРОТ 10 бил фаворизиран како дел од стратегија за економска и транспортна поврзаност со Белград.

„Денес, ДУИ се обидува да го прикаже ВЛЕН како продолжение на „српскиот свет“, но фактите покажуваат спротивно: тие се главните извршители на планот за продлабочување на српското политичко, економско и дипломатско влијание во Македонија. ДУИ сака да се заборават сите средби и лични средби на Али Ахмети и Бујар Османи со Александар Вучиќ“, стои во соопштението на ВЛЕН.

ВЛЕН потенцира дека останува силно посветен на евроатлантската ориентација на државата и нема да дозволи Северна Македонија да стане дел од агенди кои ја оддалечуваат од ЕУ и НАТО.

Извор: Журнал.мк

Македонија

Германски воен авион наместо во Приштина – принудно слета во Скопје

Германски воен авион денеска не успеал да слета на аеродромот „Адем Јашари“ во Приштина поради недостиг на сертифициран персонал за слетување во услови на намалена видливост.

Од Агенцијата за воздушна навигација информираа дека другите летови функционираат нормално, а проблемот се однесувал конкретно на воениот лет.

Податоците од платформата Flightradar24 покажуваат дека авионот полетал од Берлин во 8:40 часот наутро и бил пренасочен кон Скопје, каде безбедно слетал.

Инцидентот повторно го отвори прашањето за техничката подготвеност на аеродромот во Приштина за слетувања во комплексни метеоролошки услови.

Македонија

Инспекциите откриваат неправилности кај матичните гинеколози

09.12.2025 – Засилени контроли од страна на Управата за јавни приходи (УЈП) и Фондот за здравствено осигурување (ФЗОМ) открија дека дел од матичните гинеколози не издаваат фискални сметки за услугите кои ги наплаќаат.

Според неофицијални информации на „Слободен печат“, мерките следат по мониторингот на невладините организации од октомври 2024 година, кој покажал дека жените често плаќале за услуги кои би требало да бидат бесплатни, а без да добијат фискална сметка.

ФЗОМ истовремено ја проширил контролата и на други сектори, вклучувајќи ја службата за итна помош, како и проверка на реалноста на боледувањата и начинот на исплата на платите. Резултатите од сите инспекции се очекуваат да бидат објавени следната недела.

Директорот на ФЗОМ, Сашо Клековски, на прес-конференцијата се осврна и на проблемот со Клиниката за онкологија при Клиничкиот центар „Мајка Тереза“, каде не се изработуваат анализи за тумор маркери.

Македонија

Мицкоски: Додека јас сум премиер, нема да никне ниту еден шатор со илегални мигранти

Премиерот Христијан Мицкоски денеска јасно го потенцираше ставот на Владата дека Македонија нема да прифати илегални мигранти и нема да дозволи поставување шатори за нив на територијата на земјата.

Повод за изјавата беа објавите на британските медиуми дека Велика Британија разгледува можност за депортирање на одбиени баратели на азил во Северна Македонија, при што секој депортиран мигрант би бил платен од британската страна. Мицкоски изјави дека со британските власти оваа тема не е разговарана и дека, доколку биде, Владата ќе ја одбие таквата опција.

„Во објавите се наведува ‘неуспешни апликанти за азил да ги праќаат во трети земји’. Да потенцирам пред македонската јавност – таква тема не е предмет на разговор, а и да биде, ќе биде одбиена од наша страна. Нашата цел е заеднички да се бориме против илегалната миграција и да ја браниме Европа“, рече Мицкоски.

Премиерот додаде дека опозицијата се обидува да го користи прашањето за мигрантите за политичка кампања, но нагласи дека борбата против илегалната миграција е фундаментална политика на ВМРО-ДПМНЕ.

Тој најави и нов проект „Безбедна држава“, инспириран од концептот „Безбеден град“, кој ќе овозможи мониторинг на македонските граници и ќе го спречи илегалниот влез, шверцот и трговијата со луѓе.