Јавната презентација на предлог Детален урбанистички план (ДУП) за санација на јаловиштето во Пробиштип се одржа денеска со минимално присуство – околу 10 лица, вклучувајќи презентери, советници и вработени во локалната самоуправа. Ниту градоначалникот Драган Анастасов Ладич, ниту заинтересираните граѓани не присуствуваа на настанот.
Од ВМРО-ДПМНЕ Пробиштип ја критикуваат недоволната транспарентност и брзоплетоста во постапката. Според партијата, планот предвидува единствена намена за фотоволтаици, иако моменталните капацитети за производство на електрична енергија од сончеви панели се веќе искористени.
Покрај тоа, не е предвидена можност за градба на објекти за складирање на произведената електрична енергија, ниту се консултирани Министерството за транспорт и врски или Министерството за енергетика и минерални суровини.
Од партијата истакнуваат дека неодговорното и нетранспарентно делување може да го одложи решавањето на проблемот со јаловиштето, за кој градоначалникот претходно ветуваше дека ќе преземе конкретни чекори.
ВМРО-ДПМНЕ Пробиштип се обврзува дека ќе ја следи ситуацијата и дека санацијата на јаловиштето ќе се спроведе законски, безбедно и со јавна транспарентна постапка, со цел да се обезбеди одговорност за сите евентуални неправилности и непотребно потрошени средства.
