Градоначалникот на Општина Кисела Вода, Орце Ѓорѓиевски, оствари средба со претседателот на Стопанската комора на Северо-Западна Македонија, Нухиу Алиу, на која главна тема беше унапредувањето на бизнис-климата и создавањето услови за нови инвестиции.
На средбата, двете страни ја нагласија важноста на стабилната институционална поддршка за стопанството, како и потребата од заеднички напори за развој на претпријатијата. Ѓорѓиевски истакна дека партнерството меѓу локалните самоуправи и бизнис-заедницата е од суштинско значење за економски раст, отворање нови работни места и задржување на младите во Македонија.
„Имаме јасна цел – да обезбедиме услови во кои стопанството ќе напредува, а новите идеи и инвестиции ќе наоѓаат плодна почва“, рече Ѓорѓиевски, додавајќи дека преку соработката со Стопанската комора на Северо-Западна Македонија може да се постигне значителен исчекор во создавањето современа и конкурентна деловна средина.
