Охридското езеро по шест години повторно се порибува, со околу 1,1 милион единки охридска пастрмка, информира министерот за земјоделство, шумарство и водостопанство, Цветан Трипуновски.
„Денеска се наоѓам во Хидробиолошкиот завод – Охрид по повод порибувањето согласно договорот склучен со Министерството и Институтот за сточарство и рибарство, според Програмата од 2024 година“, истакна министерот.
Според него, обврската била да се пориби езерото со минимум 400.000 единки од Хидробиолошкиот завод и 200.000 единки од Институтот за сточарство и рибарство. Сепак, заводот одгледал 620.000 единки, а институтот околу 350.000, со што вкупниот број на риби што ќе се пуштат во езерото достигнува над милион.
Министерот додаде дека за оваа програма се обезбедени зголемени средства – 3,3 милиони денари за Хидробиолошкиот завод и 1,7 милиони денари за Институтот за сточарство и рибарство. Просечната тежина на одгледаните риби е околу 3 грама.
Трипуновски истакна дека идната година Охридското езеро ќе се пориби со над 1,6 милиони единки и дека Министерството продолжува да работи на одржување на рибниот фонд како дел од зачувувањето на ова природно богатство.
