Рускиот претседател Владимир Путин е широко прогласен за победник на самитот на Алјаска, додека руски државни медиуми го прикажуваат американскиот претседател Доналд Трамп како разборит државник, и покрај критиките од Запад дека претерал.
Медиумите во Русија нагласуваат дека Путин имал воен прелет, бил пречекан на црвен тепих, а потоа се возел во „Големото чудовиште“, претседателската лимузина на САД, заедно со Трамп. Портпаролката на рускиот министер за надворешни работи, Марија Захарова, оцени дека западните медиуми се во состојба близу до „потполна лудост“.
Најголемите успеси на Путин на самитот се поврзани со војната во Украина, каде што, делумно, успеал да го убеди Трамп да ја прифати руската визија за постигнување договор. По средбата, Трамп рече дека се согласил преговарачите да бараат директно мировно решение, наместо привремено примирје, како што претходно барале Украина и европските сојузници.
Руски државни медиуми, како и водителката Олга Скабејева, истакнуваат дека ставот на американскиот претседател се сменил и дека сега дебатата нема да се фокусира на примирје, туку на завршување на војната и на „новиот светски поредок“, како што Москва посакува.
Самитот ја означи дипломатската победа за Путин пред се, бидејќи ја разби изолацијата во која се наоѓаше Русија, но тој не ги доби сите економски цели кои ги барал. Разговорите за трговија, енергија, Арктик и технологија беа одложени, а Трамп нагласи дека нема да се зборува за бизнис додека не се реши војната во Украина.
Во меѓувреме, руските сили продолжуваат напредувањето на теренот во Украина, со цел да ја контролираат целосно индустриската област Донбас, која вклучува региите Доњецк и Луханск. Путин изјавил дека е подготвен да замрзне фронтовите во Запорожје и Херсон ако Киев се повлече од Доњецк и Луханск, што украинскиот претседател Володимир Зеленски го одбил.
Критичарите на Кремљ предупредуваат дека успехот на Путин е ограничен, бидејќи економијата на Русија покажува знаци на преоптоварување по повеќе од три години војна и строги западни санкции. Сепак, руските власти инсистираат дека економијата е отпорна, но признаваат дека следната година може да влезе во рецесија доколку не се прилагодат политиките.
Главната порака од самитот е дека и двете страни ја префрлиле одговорноста на Киев и Европа за постигнување на идните резултати во преговорите, додека Трамп ќе врши притисок врз Украина за признавање на постигнатите договори.
